Haradinaj: Nuk marr pjesë në asnjë proces ku flitet për ndarje të Kosovës
Kryeministri Ramush Haradinaj, ka theksuar se kërkimfalja nga ana e Serbisë duhet të jetë parakusht për të arritjen e marrëveshjes së pajtimit e cila do të rezultonte me njohjen e Kosovës, ndërsa thekson se në dialog në asnjë mënyrë nuk duhet të përfshihet mundësia e korrigjimit të kufijve.
Haradinaj thotë se ai nuk pranon të marrë pjesë në asnjë proces ku flitet për ndarje.
“Qëndrimin e kam të qartë: nuk lejoj, nuk pranoj, nuk e mbështes, nuk marr pjesë në një proces në të cilin preken kufijtë e vendit tim”, tha Haradinaj, në intervistë për RTV 21.
“Kosova nuk e ka luksin që t’i diskutojë dhe rihapë kufijtë e vet. Jemi njoftë nga më shumë se 100 shtete me këta kufij, jemi anëtarë të institucioneve ndërkombëtare me këta kufij. Hapja e çështjes së kufijve në cilindo variant, është rikthim në para pavarësi dhe është rrezik i madh që bart rreziqe të pamenaxhueshme”, shtoi ai.
Megjithatë, Haradinaj tha se dialogu me Serbinë duhet të vazhdojë dhe se duhet të arrihet pajtim mes Kosovës e Serbisë.
Ai ka dhënë idenë që dialogu me Serbinë ta ketë një bashkëkryesues nga opozita.
“Po e them për herë të parë, mund ta kemi një bashkëkryes nga opozita. Zoti Limaj është i hapur për një bashkëkryesues nga LDK, PSD ose VV”, tha Haradinaj.
