Haxhinasto kërkon investime për korridorin VIII, thelbësor për integrimin e rajonit

Ministri i Transportit dhe Infrastrukturës, Edmond Haxhinasto mori pjesë në mbledhjen e Këshillit të Ministrave të Transportit të BE-së, mbajtur në Milano, Itali në 16-17 Shtator.
Gjatë punimeve të Këshillit, Ministri Haxhinasto në fjalën e tij vuri theksin në domosdoshmërinë politike, ekonomike dhe sociale të përfshirjes në radarin e investimeve të korridorit VIII në kuptimin e plotë të tij.
Ai e konsideroi atë si një kontributor thelbësor për integrimin e rajonit, për paqen dhe prosperitetin e tij.

Haxhinasto përmendi investimet dhe projektet e Shqipërisë në funksion të këtij korridori, lidhjen rrugore me Maqedoninë, për rritjen e kapaciteteve të porteve shqiptare dhe intermodalitetin e Portit të Durrësit, zhvillimit të hekurudhës përgjatë korridorit dhe sjelljen në standardet e duhura të gjithë korridorit të VIII.

Gjatë takimeve me homologët gjermanë dhe malazez, ai diskutoi për mbështetjen e Korridorit Blu që lidh vendet e Ballkanit Perëndimor, i cili ishte nga projektet e rëndësishme të Takimit të Berlinit pak javë më parë.

Pjesëmarrja e Ministrit Haxhinasto në Këshillin e Ministrave të transportit të BE-së shënon prezencën e parë të Shqipërisë në këtë Këshill, duke shënuar një hap të ri në integrimin e Shqipërisë në institucionet evropiane, mundësi konkrete për të qënë pjesë e panifikimit strategjik të rrjeteve të transportit, dhe shanse më të mëdha financimi nga organizata ndërkombëtare financiare