Haxhinasto: Korridori Adriatiko-Jonian të planifikohet në nivel rajonal
Në ditën e dytë të punimeve të Këshillit të Ministrave të Transportit të BE-së, Ministri i Transportit dhe Infrastrukturës, Edmond Haxhinasto zhvilloi takime me krerët e transportit dhe infrastrukturës së Malit të Zi dhe Maqedonisë, Ivan Brajovic dhe Mile Janakieski.
Në diskutimet me homologun malazez vend të veçantë zuri intensifikimi i përpjekjeve për materializimin e punës për projektin e përbashkët të korridorit Adriatiko-Jonian, duke filluar me përfshirjen e tij në planifikimin strategjik të nivelit rajonal, në Observatorin e Transportit të Evropës Jug-Lindore, dhe në atë të korridoreve evropian TREN-T. Kjo do i hapte rrugë studimit të fizibilitetit, projektimit dhe më pas zbatimit të këtij korridori kaq të rëndësishëm për të gjithë bregun perëndimor të Ballkanit.
Ndërsa me homologun maqedonas biseda u fokusua drejt koordinimit të punës si në transportin rrugor, dhe atë hekurudhor.
Ministri Haxhinasto i kërkoi homologut Janakieski koordinim në pjesën maqedonëse të rrugës së Arbërit, si një urë e rëndësishme lidhëse ekonomike dhe sociale.
Gjithashtu, ministri Haxhinasto theksoi se trajtimi i lidhjes hekurudhore Shqipëri-Maqedoni si një e tërë është parakusht për implementimin e suksesshëm të këtij projekti të rëndësishëm për dy vendet.
