Investimet në rrjetin energjetik, drejt përfundimit nënstacioni i Orikumit
Ministri i Infrastrukturës dhe Energjisë, Damian Gjiknuri inspektoi disa prej investimeve në rrjetin energjetik në zonën e bashkisë Vlorë.
Në fillim ai u ndal në kantierin e hapur në Orikum ku tanimë është drejt përfundimit nënstacioni i ri elektrik që lidh rrjetin 110 kV me rrjetet 35 dhe 20 kV, investim i Operatorit të Sistemit të Transmetimit (OST).
“Jemi drejt përfundimit të një prej veprave të rëndësishme energjetike këtu në Qarkun e Vlorës që është nënstacioni elektrik i Orikumit. Nënstacioni do bëjë të mundur përmirësimin e furnizimit me energji të të gjithë zonës së Orikumit ku efekti do të jetë i menjëhershëm me lidhjen që do të ketë rrjeti 35 kV”, – tha Gjiknuri.
Sipas tij, këto janë investime të nevojshme për këtë zonë turistike. “Ka pasur dhe shqetësime nga banorët për furnizimin por e rëndësishme është mesazhi që po jepet se investimet janë të mëdha dhe po vazhdojnë. Kjo është një nga veprat më të mëdha pas linjës 110 Kv që ne tashmë e kemi përfunduar dhe besoj se në kuadrin e një viti situata do ketë ndryshuar radikalisht në gjithë zonën e Orikumit”, – theksoi Gjiknuri.
Ndërkaq, i shoqëruar nga administratori Adrian Çela dhe drejtori rajonal Erion Osmanaj, ministri Gjiknuri pa nga afër edhe investimet që po kryen Operatori i Shpërndarjes së Energjisë Elektrike (OSHEE) në qytetin e Vlorës.
“Qyteti i Vlorës jo vetëm që ka përfituar këto 800 milionë lekë të reja dhe ka në proces edhe 1.2 miliardë lekë të reja investime që janë duke u zbatuar, por ne kemi edhe një projekt tjetër agresiv investimi në bashkinë e Vlorës. Ky projekt i ri ka të bëjë me sistemimin e rrjetit elektrik nga tuneli i Ujit të Ftohtë deri në zonën e Radhimës që shkon rreth 2.2 miliardë lek të reja. Gjithë këto rezultate dhe gjithë këto investime arrihen edhe në saj të performancës së kompanisë dhe bashkëpunimit të qytetarëve”, – u shpreh administratori i OSHEE Adrian Çela.
Ministri Gjiknuri vuri theksin tek nevoja për të miradministruar këto investime tanimë të kryera dhe ato në proces.
“Përpara katër vitesh humbjet e energjisë në Vlorë ishin mbi 50%, sot që flasim janë nën 20%. Pra kemi një kapërcim galopant duke kursyer, duke administruar më mirë mallin e përbashkët të qytetarëve. Akoma ka punë dhe ka nevojë për administrim më të mirë, por rezultatet janë impresionuese dhe kjo ka ardhur si rrjedhojë e mirëmenaxhimit të kompanisë dhe strukturave në terren”, – nënvizoi Gjiknuri.
