ISIS konfirmon vdekjen e xhihadistit “Xhon”

Revista propagandistike e Shtetit Islamik “Dabiq” ka konfirmuar vdekjen e militantit te njohur si “Xhon xhihadisti”, në një sulm me dron në muajin nëntor. Grupi publikoi një nekrologji për xhihadistin, emri i vërtetë i të cilit ishte Muhamed Emwazi.

Në muajin nëntor, Ushtria amerikane bëri të ditur përmes një njoftimi se e kishte vrarë atë në bastionin e ISIS në Raka. Emwazi u shfaq në videot e ekzekutimeve me prerje koke të disa pengjeve të huaja, si gazetarët amerikanë James Foley e Stiven Sotloff, vullnetari britanik David Haines dhe disa të tjer.

Në elegji, Emwazit, i referohen si Abu Muharib al-Muhajir, pseudonimi i tij brenda grupit dhe detajet e vdekjes konfirmojnë verisonin amerikan të ngjarjeve.

Grupi ekstremist thotë se militanti i lindur në Kuvajt, u vra më 12 nëntor kur makina me të cilën po udhëtonte u shënjestrua nga një dron në qytetin e Rakas. Siç raportohet, makina u shkatërrua dhe xhihadisti mbeti i vdekur në vend.

Një fotografi ku Emwazi shfaqet me fytyrën e pa mbuluar, i buzëqeshur e me vështrimin drejt tokës, shoqëron tekstin e shkruar në formë homazhi për një njeri që grupi e cilëson si një vëlla të nderuar.

I pagëzuar nga mediat si “Xhon xhihadisti”, xhelati i ISIS-it, u identifikua në shkurt të 2015-s si Emawazi, një i diplomuar në shkenca kompjuterike i rritur në Londër.

Pas shfaqjes në shumë prej videove të ekzekutimeve të pengjeve të huaja, ai u bë një shënjestër kryesore e Shërbimeve Sekrete amerikane dhe britanike edhe pse mendohej se nuk kishte luajtur një rol ushtarak brenda ISIS. Tre drone, një britanik dhe 2 amerikanë u përfshinë në sulmin ku mbeti i vrarë ekstremisti.