Itali, identifikohet celula xhihadiste shqiptare me bazë në Venecia
Autoritetet italiane të anti-terrorit kanë identifikuar praninë e një celule xhihadiste në qytetin e Venecias, e cila përbëhet nga shtetas shqiptarë.
Lajmin e bën të ditur revista “L’Espresso” në edicionin e saj online, sipas të cilës, grupi udhëhiqet nga Baftjar Bruka, i kërkuar në rang ndërkombëtar për pjesëmarrje në përgatitjen dhe kryerjen e tre atentateve, më 10 shkurt të këtij viti në Tiranë.
Sipas revistës, Bruka është një teknik në gjendje të realizojë mjete shpërthyese të lidhura me celularë, metodë përmes të cilës ka goditur tre herë në Tiranë.
Atentatet në fjalë i përkasin atyre kundër babait të ministrit të Brendshëm Saimir Tahiri dhe të një drejtuesi të policisë. Atentati i tretë dështoi.
Bruka rezulton të jetë një personazh i njohur për hetuesit italianë. Ai ka shkelur në vendin fqinj më shumë se një herë dhe u është nënshtruar disa kontrolleve të policisë.
Në vitin 2013, ai u ndalua fillimisht në Piza dhe më pas në stacionin hekurudhor të Firences. Më pas, në shkurt 2014 ai ka lënë gjurmë në Venecia, ku i është nënshtruar kontrollit të radhës nga policia.
Kjo e fundit dyshon se pikërisht qyteti ujor mund të jetë destinacioni i shtetasit shqiptar, pasi atje anti-terrori ka zbuluar një rrjet mbështetësish të të dyshuarit për terrorizëm.
