Ja pse është mirë të kemi më shumë miq

Sa më i madh që është rrjeti social, aq më shumë stimulohet truri juaj, thuhet në studimin e shkencëtarëve nga Oxfordi të cilët, gjatë një periudhe njëmujore kanë përcjellë 18 meshkuj dhe femra si dhe kontaktet e tyre sociale, raporton Daily Mail.

Numri mesatar i miqve me të cilët ata kishin kontaktuar ishte rreth 20, disa kontaktuan me më shumë se 40 njerëz, ndërsa disa kontaktuan me vetëm pak miq. Imazhet e rezonancës magnetike të aktivitetit të trurit treguan se tek ata me një rreth më të gjerë të miqve, shumë pjesë të trurit ishin më aktive dhe më të mëdha.
“Tek personat e shoqërueshëm, këto rrugë të komunikimeve janë si autostrada, dhe jo rrugë të vogla, gjë që e bën procesimin e informacionit më efikas dhe më të mirë”, sqaron autorja e studimit, MaryAnn Noonan. Studimet e mëparshme tek majmunët kanë treguar rezultate të ngjashme, prandaj shkencëtarët mendojnë se nuk është rasti që njerëzit e shoqërueshëm thjesht kanë të lindur me një tru të pajisur më mirë për të krijuar lidhje sociale.
Përkundrazi, ata besojnë që njerëzit me më shumë miq përdorin më shpesh zona specifike të trurit, duke çuar në rritjen më të shpejtë për ta mbajtur ritmin me kërkesat e tyre të rrjeteve sociale. “Do të thosha se truri ndryshon si reaksion ndaj madhësisë së rrethit social”, thekson dr. Noonan duke shtuar se kjo nuk do të thotë se ka ndikime gjenetike.“Nëse rridhni nga një familje e shoqërueshme, do të keni predispozita për shoqërim. Shpresojmë se njohuria rreth asaj se si truri reagon ndaj situatave sociale do të çojë në mënyra të reja të trajtimit të autizmit, skizofrenisë dhe sëmundjeve të tjera në të cilat njerëzit rrallë bashkëveprojnë me njëri-tjetrin.”