Kampionati i futbollit të vajzave do të luajë javën e 5-të këtë fundjavë, teksa ndeshjet do të luhen të ndara në dy ditë. Kjo javë rezervon takime shumë interesante, duke nisur me Apolonia-Teuta, që do të jetë edhe sfida hapëse e kësaj jave të pestë, e planifikuar për t’u luajtur të shtunën në ora 12:00 në Fier. Apolonia do të luajë vetëm për 3 pikët në shtëpi, teksa vjen në këtë ndeshje pas fitores së rëndësishme ndaj Laçit në fushë të huaj, ndërsa Teuta u mund javën e kaluar nga Kinostudio në shtëpi. Ndërkaq, sfida tjetër e së shtunës është ajo mes Vllaznisë dhe Partizanit, me të kuqet do të udhëtojnë drejt Shkodrës, teksa sfida është planifikuar të nisë në ora 14:00 dhe do të luhet në Fushë “Reshit Rusi”. Në javën e kaluar, Partizani u mund në minutat e fundit nga Tirana në shtëpi, ndërsa Vllaznia nuk njeh humbje në këto katër javë kampionat dhe nuk ka pësuar asnjë gol.

Të dielën do të zhvillohen edhe 3 sfidat e tjera të javës së 5-të. Tirana do të presë në shtëpi Laçin, një ndeshje e lehtë në letër për vajzat bardheblu që e kanë nisur shumë mirë kampionatin dhe kërkojnë të vijojnë me këtë ecuri pozitive. Sakaq, Laçi nuk e ka shijuar ende fitoren këtë sezon, teksa do të tentojë të bëjë surprizën në Kompleksin “Skënder Halili”. Në dy ndeshjet e tjera të së dielës, Kukësi do të presë në shtëpi Skënderbeun, me përballjen që nis në ora 13:00, kurse Lushnja viziton kryeqytetin për t’u ndeshur me Kinostudion, në ndeshjen që luhet në Qendrën Sportive të Ekipeve Kombëtare, në Kamëz, duke nisur nga ora 14:00.