Kievi i blen ”Gazprom”-it 378 milionë dollarë gaz
Grupi publik ukrainas ”Naftogaz” njoftoi sot se i kishte parapaguar gjigantit rus ”Gazprom” 378 milionë dollarë për livrimin e rreth një miliardë metrave kub gaz rus.
Gazprom konfirmoi sot këtë pagesë nëpërmjet zëdhënësit, Serguei Kuprianov”, sipas agjencisë ruse të lajmeve ”TASS”.
Rusia ndërpreu në muajin qershor livrimet e gazit në Ukrainë, pasi kjo e fundit refuzoi rritjen e çmimit të vendosur nga Gazprom. Konflikti rriti frikën tek evropianët për një çrregullim të furnizimeve që kalojnë tranzit nga territori i ish-republikës sovjetike gjatë periudhës së dimrit.
Pas disa negociatash, Ukraina, Rusia dhe Bashkimi Evropian arritën në muajin tetor një zgjidhje të përkohshme të mosmarrëveshjeve. Këto marrëveshje janë përqendruar në verifikimin e shumave të papaguara nga Ukraina dhe mbi mundësinë e pagesave të livrimeve deri në mars të vitit 2015.
Ukraina ka paguar një pjesë të borxhit prej 3,1 miliardë dollarësh ndaj Rusisë që prej fillimit të muajit nëntor duke dhënë këstin e parë prej 1,45 miliardë dollarësh. Pjesa e dytë prej 1,65 miliardë mbetet për t’u paguar deri në fund të vitit.
