Email-i i drejtorit të FBI-së sulmohet nga hakerë të dyshuar të lidhur me Iranin

Hakerët nga grupi ”Handala”, të dyshuar për lidhje me Iranin, hakuan llogarinë personale të email-it të Kash Patel, drejtorit të FBI-së, dhe publikuan dokumente dhe foto që morën në internet, raportuan sot disa medie amerikane.

”Handala”, një nga grupet më aktive të krimit kibernetik që nga fillimi i luftës së nisur nga Shtetet e Bashkuara dhe Izraeli kundër Iranit, konsiderohet nga shumë ekspertë të sigurisë kibernetike si i lidhur me Republikën Islamike.

”Hakerët publikuan foto dhe email-e të Kash Patel që datojnë shumë kohë përpara emërimit të tij si drejtor i FBI-së në vitin 2025, kryesisht nga periudha midis viteve 2011 dhe 2022”, raporton CNN, duke cituar burime pranë hetimit të cilat, ashtu si medie të tjera, konfirmojnë vërtetësinë e dukshme të këtyre dokumenteve.

Departamenti i Drejtësisë i SHBA-së dhe FBI-ja refuzuan të komentojnë.

Grupi ”Handala” mori përgjegjësinë për sulmin kibernetik në një mesazh të ripostuar në llogaritë e monitorimit të mediave sociale, duke deklaruar se ishte hakmarrje për sekuestrimin e emrave të domeneve që u përkisnin atyre nga FBI-ja.

Javën e kaluar, Departamenti i Drejtësisë i SHBA-së njoftoi sekuestrimin e katër faqeve të internetit, dy prej të cilave mbanin emrin ”Handala”, të cilat pretendohej se ishin të lidhura me aktivitetet e “sulmit kibernetik” të Ministrisë iraniane të Inteligjencës dhe Sigurisë./  a.jor.