Kjo është luftë ndaj fëmijëve
Lufta në Siri ka lënë pas shumë dhimbje, varfëri, trishtim, lot të cilat asgjë nuk i dokumenton dot më qartë sesa imazhet e fëmijëve të pafajshëm.
Dhjetëra video dhe foto janë shpërndarë në ueb së fundmi, ku shihen qartazi se kjo luftë fatkeqësisht po rëndon më shumë tek ata. Një prej tyre është edhe Aya, 8 vjeçarja që u shfaq pak kohë më parë në një qendër mjekësore e mbuluar me pluhur dhe gjak.
Konfuze dhe e trembur ajo kërkon pa pushim babanë e saj. Aya u nxor nga rrënojat së bashku me anëtarët e tjerë të familjes pas sulmeve ajrore që goditën shtëpinë e tyre në Talbiseh, një qytet në veriperëndim të Sirisë. Nëna e Ayas babai dhe tre vëllezër të tjerë u plagosën gjithashtu.
Imazhe të tjera rrëqethëse nga Siria kanë tërhequr vëmendjen e botës, si ajo e 5 vjeçarit nga Aleppo, që u plagos gjatë bombardimeve. Rreth një vit më parë, bota reagoi e tmerruar nga imazhet e Alan Kurdit, i njohur edhe si “djali i bregut të detit”, i cili u gjet i mbytur pasi familja e tij tentoi të largohej nga Siria nëpërmjet detit Mesdhe.
Ndërkohë që ndërkombëtarët punojnë për të gjetur një rrugë për daljen nga konflikti, bombardimet në Siri vazhdojnë dhe qyteti i Alepos, epiqendra e betejës është kthyer tashmë në një qytet fantazmë.
