Kosova dështon përfundimisht të pranohet në INTERPOL, merr vetëm 68 vota

Kosova përfundimisht nuk do të jetë pjesë e INTERPOL-it. Edhe pas raundit të dytë të votimit vendi nuk ka arritur të marrë 2/3 e votave për t’u bërë pjesë e njërit nga mekanizmat më të rëndësishëm të sigurisë në botë.

Express raporton se në raundin e dytë të votimit, Kosova ka marrë 68 vota pro, 51 kundër dhe 16 abstenime, nga 135 total.

Qeveria e Kosovës me anë të një komunikate ka shprehur zhgënjimin për mos anëtarësimin e shtetit në Interpol. Sipas Qeverisë, fushata e egër e Republikës së Serbisë dëshmoi edhe njëherë karakterin e saj kundër Kosovës dhe kundër idesë për normalizim të raporteve me Republikën e Kosovës, aq më parë, kur ky anëtarësim ishte teknik dhe jo politik. “Votimi kundër pranimit të Kosovës në këtë organizatë ndërkombëtare i bën shërbim vetëm krimit dhe kriminelëve dhe askush nuk do të duhej t’i gëzohej këtij fakti”, thuhet në komunikatën e Qeverisë.  Qeveria e Republikës së Kosovës, falënderon të gjitha shtetet që votuan për, si dhe të gjithë ata që u përpoqën ta ndihmojnë Kosovën në këtë proces të rëndësishëm.

Pas dështimit të Kosovës për t’u bërë anëtare e INTERPOL-it mediat serbe kanë njoftuar se presidenti i Serbisë Aleksandar Vuçiç dhe shefi i diplomacisë Ivica Daçiq do të mbajnë një konferencë për media.