Kosovë, Kadare vlerësohet me Çmimin Ndërkombëtar “Letërsia Shqipe”
Ismail Kadare është vlerësuar sot në Kosovë, në një ceremoni të veçantë të organizuar nga Ministria e Kulturës së Kosovës me Çmimin Ndërkombëtar “Letërsia Shqipe”.
“Ky është një nga vlerësimet më të mëdha që Kosova ka për një personazh në fushën e kulturës. “Falënderoj Kosovën dhe lexuesit e mi të Kosovës. Jam vërtetë i nderuar të marrë këtë çmim. Më besoni ky çmim i dhëne nga Kosova ka kuptim më tepër se një çmim për mua dhe më jep kënaqësi me shumë se çdo çmim tjetër. Jam i lumtur kur mendoj që po e marr çmimin në Bibliotekën e Kosovës, në mbretërinë e lexuesve”, u shpreh Kadare pas cmimit.
Drejtori i Bibliotekës Kombëtare “Pjetër Bogdani” tha se ka ardhur koha që në historinë e Kosovës të ketë vend të privilegjuar për librat dhe Ismail Kadarenë. “Për lexuesit e Kosovës, Kadareja është shkrimtar i zemrës. Kadare është autor që nuk është braktisur asnjëherë”, tha Gajraku.
Në këtë udhëtim drejt Kosovës, Kadare shoqërohet nga bashkëshortja Helena dhe botuesi Bujar Hudhri. Nesër Qeveria e Kosovës do të organizojë një darkë të vecantë për nder të shkrimtarit. Kadare njihet si një nga mbrojtësit më të mëdhenj në shkrimet e librat e tij të identitetit shqiptar, si dhe më aktivi përsa i përket cështjes së Kosovës.
Kosova ka qënë pjesë e hershme e librave të tij që gjatë komunizmit, duke bërë që ajo të dukej pjesë e natyrshme e Shqipërisë organike.
