Kreu i KLSH-së nuk arrestohet pa lejen e Kushtetueses
![](https://24-ore.com/wp-content/uploads/2014/10/Komisioni-i-Ekonomise-320x213.jpg)
Debate në komision për projektligjin. Braçe: Kush arrestohet, të shkarkohet.
Nga Zamir Alushi
Nëse kreu i KLSH-së arrestohet, të shkarkohet nga detyra. Ky propozim që u bë nga kreu i Komisionit për Ekonominë, Erion Braçe, ngjalli debate dhe nuk u miratua nga deputetët e tjerë të mazhorancës dje, gjatë shqyrtimit nen për nen të ligjit për KLSH-në. Diskutimi i këtij drafti në komision është shoqëruar me debate mes kreut të komisionit, Erjon Braçe, dhe kryetarit të KLSH-së, Bujar Leskaj, në lidhje me funksionimin e këtij institucioni, në rast shkeljeje ligjore apo arrestimi. Kjo, sipas Braçes, për të mos hasur në ngërçin e krijuar pas situatës së fundit me institucionin e Bankës së Shqipërisë. Por kreu i KLSH-së, Leskaj, i ka sugjeruar kreut të Komisionit të Ekonomisë se nëse do rregullime për këtë gjë, duhet ta bëjë për të gjitha institucionet. Shtesa e propozuar nga Braçe u kundërshtua edhe nga një deputet i mazhorancës që tha se arrestimi është një çështje e gjykatës dhe nuk mund të vendoset në këtë ligj si shkak për shkarkimin. Erion Braçe ka deklaruar se e shtron këtë kërkesë, sepse në asnjë institucion në Shqipëri, nuk jep njeri dorëheqjen. “Çfarë ndodh nëse kreu i KLSH-së arrestohet për ndonjë krim, patën rastin e dikujt që mendonte se drejtonte nga burgu”, solli si shembull Braçe. I pranishëm në këtë mbledhje, kreu i KLSH-së, Bujar Leskaj, përgjigjet: “Nëse doni rregullime për këtë gjë, duhet ta bëni për të gjitha institucionet”. Projektligji ka përcaktuar për herë të parë disa raste specifike se kur shkarkohet nga detyra kreu i KLSH-së. “Kryetari i Kontrollit të Lartë të Shtetit mund të shkarkohet nga Kuvendi me propozim të Presidentit të Republikës”, përcaktohet në draft dhe vijojnë rastet e mbarimit të mandatit dhe të shkarkimit. Lidhur me rastet e implikimit në një krim, imuniteti i kryetarit të KLSH-së “u blindua” me një nen të veçantë. Sipas nenit 22, kryetari i Kontrollit të Lartë të Shtetit ka imunitetin e gjyqtarit të Gjykatës së Lartë. Ai gëzon imunitet për mendimet e shprehura dhe vendimet e marra në ushtrim të funksioneve të tij. Kryetari i KLSH-së nuk mund të arrestohet apo t’i hiqet liria në çfarëdo formë apo ndaj tij të ushtrohet kontroll personal ose i banesës, pa autorizimin e Gjykatës Kushtetuese, përveçse nëse kapet në kryerje e sipër ose menjëherë pas kryerjes së një krimi. Në këtë rast, Prokurori i Përgjithshëm vë menjëherë në dijeni Gjykatën Kushtetuese, e cila në qoftë se nuk jep pëlqimin brenda 24 orëve për dërgimin në gjykatë, organi kompetent është i detyruar ta lirojë atë. Kontrolli i Lartë i Shtetit pritet të zgjerojë kompetencat dhe ushtrimin e kontrolleve të detajuara si mbi buxhetin, ashtu dhe mbi partitë politike, se si i shpenzojnë fondet shtetërore. E re në këtë ligj është edhe e drejta e audituesve të këtij institucioni, për të kontrolluar performancën tatimore, në mënyrën e mbledhjes së të ardhurave, por jo vetëdeklarimet e biznesit privat. Pas disa muajsh diskutime, Kontrollit të Lartë të Shtetit i jepet e drejta që të marrë informacionin e kërkuar prej Drejtorisë së Tatimeve. Projektligji po diskutohet prej më shumë se 2 vitesh, por mungesa e 84 votave ka sjellë shtyrjen e tij.
Shkarkimi
-Rastet kur hiqet nga detyra kreu i KLSH-së
a) Shkel Kushtetutën ose shkel rëndë ligjin gjatë ushtrimit të funksioneve të tij;
b) Cilësohet nga gjykata me vendim të formës së prerë si i paaftë për të kryer detyrat e tij;
c) Dënohet nga gjykata me vendim të formës së prerë për kryerjen e një krimi,
ç) Kryen akte ose sjellje që diskreditojnë rëndë pozitën dhe figurën e tij.
d) Zbulohen raste të papajtueshmërisë së funksionit të tij.
-Në rast se vendi i Kryetarit mbetet vakant, Presidenti, brenda 15 ditëve, i propozon Kuvendit kandidaturën e re. Kuvendi zgjedh Kryetarin e KLSH-së brenda 15 ditëve nga paraqitja e kandidaturës.