Kryeministri spanjoll, “non grata” në qytetin e tij

Partia Socialiste spanjolle, Lëvizja Podemos dhe blloku nacionalist i Galicias votuan duke shpallur persona “non grata” kryeministrin spanjoll, Mariano Rajoy, në qytetin e tij Pontevedra.

Këshilltarët bashkiakë të Partisë Popullore të Rajoyt nuk morën pjesë në votim dhe e cilësuan atë qesharak. Sidoqoftë, në mbledhjen e bashkisë merrnin pjesë qindra njerëz dhe për kryebashkiakun Miguel Anxo Fernandez Lores ishte e vështirë të mbante rregullin. Jashtë bashkisë me qindra protestues të tjerë mbështetën vendimin e autoriteteve lokale duke hedhur parulla të shumta kundër kryeministrit.

Megjithëse ka lindur në qytezën fqinje Santiago de Compostela, Rajoy konsideron Pontevredrën si qytetin e tij ku njohu bashkëshorten, shërbeu si këshilltar në bashki, si kryetar i shërbimit publik provincial dhe si deputet i zonës.

Por, autoritetet lokale vendosën që ta shpallin “non grata” pasi Ministria e Ambientit në Madrid i zgjati licencën e tokës në Pontevedra edhe për 60 vjet kompanisë “Ence”.

Banorët dhe kritikët e kësaj lëvizje kërkonin që licenca të mos rinovohej pas skadimit në 2018-n, në mënyrë që lumi t’i kthehej atyre dhe të ndalej ndotja. Sipas anëtarëve socialistë të Këshillit Bashkiak, Rajoy kishte vepruar si një anëtar i bordit drejtues të kompanisë.

Në fakt, sipas mediave spanjolle, deri para pak vitesh, partia e Rajoyt kishte mbështetur mbylljen e fabrikës pas skadimit të licencës në vitin 2018.