Kurti apel “Listës Serbe”: Mos i bojkotoni institucionet e Kosovës, ato na shërbejnë të gjithëve

Kryeministri Albin Kurti, pasi “Lista Serbe” u largua nga institucionet e Kosovës, apeloi sot që të mos bojkotohen apo braktisen këto institucione, pasi ato u shërbejnë të gjithëve.

Sipas tij, përfaqësues të “Listës Serbe” para një jave kanë thënë që do të organizojnë rezistencë të ashpër kundër gjobave, mirëpo, nuk e pritën 21 nëntorin, pasi Beogradi nisi kërcënimet dhe përgatitjet për destabilizimin e Kosovës.

“Nga 1 nëntori ka filluar dhënia e qortimeve apo vërejtjeve ndaj ngasësve të veturave që bartin tabela ilegale në territorin e Kosovës, trashëgimi ato e regjimit të Milosheviqit. Deri më sot, numri i qortimeve të dhëna është gjithsej 843. Nuk ka pasur asnjë incident dhe nuk është regjistruar asnjë ankesë. Kështu do të vazhdojmë për tri javë, pra deri më 21 nëntor, atëherë kur fillojnë gjobat ashtu siç parashihet me ligj. Ndërkohë, qytetarët me tabela ilegale KM, PR etj. do të mund t’i konvertojnë ato në legale RKS me lehtësime të mëdha tatimore.”-shkruan Kurti, në rrjetin e tij social, Facebook.

Kryeministri i Kosovës thekson se është e qartë se për çfarë bëhet fjalë, pasi presidenti i Serbisë ka gënjyer dhe ka zhgënjyer amerikanët dhe evropianët, sepse ai shumë shpesh takon dhe koordinohet me ambasadorin rus në Beograd.

“Serbia, duke mos qenë vend demokratik, po bëhet vegël e Kremlinit. Po ashtu, duket që ish- zëdhënësi i partisë së Milosheviqit, tash ministër i jashtëm i Serbisë, është më i pushtetshëm sesa ish- ministri i informatave të Milosheviçit, tash presidenti i Serbisë. Kjo është betejë personale e tyre për pushtet, as për qytetarët dhe as për shtet. Me marrëveshjen e Kumanovës të 9 qershorit 1999, Serbia ka kapitulluar dhe i ka thënë lamtumirë Kosovës. Nuk ka nevojë të humbim kohë e të vazhdojmë të vonohemi edhe në vitin 2022. Duke e përkrahur Milosheviçin dhe Sheshelin para çerek shekulli, e keni lënë Kosovën. Duke e përkrahur Putinin e Lavrovin sot, po e lini Evropën.“- thekson Kurti.

Ai ka ftuar të gjithë qytetarët serbë në Kosovë, që të ruajnë qetësinë, paqen dhe sigurinë, sepse nuk është kryeministër kundër serbëve, por Beogradi është kundër tij.

“Unë jam kryeministër që do t’ju shërbej duke respektuar kushtetutshmërinë dhe ligjshmërinë e Republikës së Kosovës. Prioritet imi janë luftimi i korrupsionit, pra drejtësia, zhvillimi ekonomik, pra punësimi; barazi e mirëqenie për të gjithë, pa dallim etnie, feje apo prejardhje. Mos i bojkotoni ose braktisni institucionet e Kosovës. Ato na shërbejnë të gjithë neve, çdonjërit prej jush. Mos bini pre e manipulimeve politike dhe lojërave gjeopolitike. Le t’i përmbahemi të gjithë bashkë vlerave demokratike dhe evropiane të sundimit të ligjit, të të drejtave dhe lirive të njeriut e të pakicave, pluralizmit politik.“- përfundon postimin Kurti.