Lame: 14 mijë ndërtime rrezikojnë legalizimin me planin e ri rregullues
Kreu i ALUIZNI-t, Artan Lame ka deklaruar sot se 14 mijë objekte rrezikojnë legalizimin për shkak të planit të ri rregullues.
Në një deklaratë për mediat ditën e sotme Lame theksoi se situata paraqitet më e vështirë në bashkinë e Kamzës dhe komunën Paskuqan ku gjendet edhe numri më i madh i ndërtimeve informale të cilat me planin e ri rregullues rrezikojnë legalizimin.
“Situata më problematike paraqitet në Kamëz dhe Paskuqan. Janë rreth 14 mijë objekte për të cilat vazhdimi i procesit të legalizimit paralizohet nga këta kryekomunarë. I gjithë territori i Bashkisë Kamëz me planin rregullues parashikon ndërtime deri në 9 kate. Gjatë gjithë bulevardit ‘Berisha’ parashikohen ndërtime të larta ndaj bllokohen dhe nuk mund të legalizohen”, – u shpreh Lame.
Lame theksoi se në kryeqytet njësitë më të rrezikuara janë njësia 6 dhe 7, ish-Fusha e Aviacionit dhe Kombinati, ku rrezikojnë të përjashtohen nga legalizimi 5 mijë objekte. Nisur nga kjo situatë kreu i ALUIZNI-t ka kërkuar bashkëpunimin e bashkisë së Tiranës për rishikimin e planit rregullues, ndërkohë që ka bërë me dije se do i dërgohet një kërkesë e njëjtë edhe kryeministrit Edi Rama.
