Lëvizje në qeveri, ikën Cani; Arben Ahmetaj ministër i Financave

Këshilli i Ministrave ka emëruar këtë të martë Arben Ahmetaj në postin e ministrit të Financave, pas largimit të papritur të Shkëlqim Canit.

Ndërkohë, Milva Ekonomi, deri dje zv.ministre e Shëndetësisë, është emëruar ministre e Ekonomisë në vend të Ahmetaj.

Për momentin shkaqet e largimit të Canit nuk dihen, por kryeministri Rama e ka falenderuar atë për bashkëpunimin dhe profesionalizmin e lartë.

“Cani, me integritet të plotë kreu një prej detyrave më të vështira të qeverisë”, ka deklaruar Rama.

Edhe Cani, nga ana e tij, ka vlerësuar bashkëpunimin me shefin e qeverisë “për të kapërcyer me sukses situatën e rëndë financiare”.

Lëvizja e fundit e bërë në radhët e qeverisë ka qenë ajo e ministrit të Drejtësisë, Nasip Naço, nga LSI, që u zëvendësua nga Ylli Manjani i së njëjtës parti.