Ligji i ri i energjisë, pengohet rishikimi i tarifave për KESH dhe OSHEE

 Hyrja në fuqi e ligjit të ri të energjisë në fillim të vitit që shkoi ka penguar rishikimin e tarifave të energjisë ndaj KESH, OSHEE, OST, pasi ende mungojnë vendimet, rregulloret dhe aktet nënligjore që rregullojnë funksionimin e ligjit e për pasojë edhe tarifat e reja.
Ne përgjigjen e që ERE i ka çuar KESH informohej se paraqitja nga ana e kompanisë e aplikimit për rishikimin e tarifave dhe çmimeve për vitin 2016 ishte e pamundur për arsyet se Ligji i ri “Per Sektorin e Energjisë Elektrike” nuk parashikon funksion te Furnizuesit Publik me Shumice, te cilin aktualisht e kryen KESH sh.a. sipas përcaktimeve te nenit 25 te ligjit te shfuqizuar nr. 9072 date 22.05.2003 .

Enti Rregullator vëren se mungojnë aktet nënligjore dhe rregullatore në zbatim të ligjit të ri që përcaktojnë qartë detyrat dhe funksionet e secilit prej pjesëmarrësve të tregut të energjisë elektrike, si dhe detyrimet për ofrimin e shërbimit publik. Ligji 43/2015 në nenin 108 të tij I ka lënë ERE-s dhe organeve përgjegjëse si Këshilli i Ministrave, Ministria e Energjisë apo të licencuarit sipas parashikimeve të ligjit, një afat prej 12 muajsh për hartimin dhe miratimin e këtyre akteve nga ERE.

“Institucionet përgjegjëse për rregullimin e sektorit nuk kanë nxjerrë udhëzimet përkatëse se si do të mund te aplikohet regjimi i tarifave për shoqërinë KESH sh.a. për vitin 2016, duke respektuar parashikimet e ligjit Nr. 43/2015 “Për Sektorin e Energjisë Elektrike”, referon OSHEE.
Me përfundimin e afatit të vendimeve ekzistuese pjesëmarrësit e tregut, janë gjendur pa tarifa të reja për shitjen e energjisë elektrike.