Marrëveshja BE-Britani, Cameron: Status special për vendin

Marrëveshja e arritur ndërmjet David Cameron dhe udhëheqësve europianë është përshendetur nga britanikët, pasi vendi mori një status “special” në Union.

Pas një maratone bisedimesh në Bruksel, shefi i Londrës duket se arriti qëllimin e tij, të bindte liderët e tjerë për të hartuar një marrëveshje e cila zgjat për një periudhë 7-vjeçare dhe përfshin ndryshimin e traktateve të BE-së.

“Më në fund marrëveshja u arrit. Për një periudhë kohe ne e kemi nxjerrë Britaninë jashtë një Europe që po bëhet gjithnjë e më e ngushtë. Britania nuk do të jetë kurrë pjesë e një Europe të përqëndruar. Falënderoj të gjithë liderët për qetësinë e treguar, vullnetin dhe asistencën e tyre”, u shpreh Cameron.

Marrëveshja bazohet ne politikat financiare dhe sovranitetin e shtetit anglez. Pikat kyçe te saj janë kufizimi në përfitimin e të ardhurave të emigrantëve në Britani, bashkimi sa më i ngushtë i bllokut europian nuk do të përfshijë Anglinë, pra thënë më shkurt vendi do të fitojë një lloj autonomie nga blloku, e po ashtu pakti siguron një tregti të drejtë e të lirshme për bizneset britanike të cilat nuk do të përballen me “diskriminim” se janë jashtë Eurozonës.

Tashmë kryeministri David Cameron do të bëjë fushatë të vendosur për të mbajtur Mbretërinë e Bashkuar brenda Unionit në referendumin e qershorit, ku do i duhet të përballet edhe me parlamentarët që jane pro një “Brexit”.

Statusi special i Londrës në Union u përshendet edhe nga presidenti i Këshillit të Bashkimit Europian, Donald Tusk.

E ndërsa kancelarja gjermane Angela Merkel u shpreh se kjo marrëveshje kërkoi “shumë gatishmëri për të arritur në një kompromis”, por se kompromiset e tilla tha ajo, justifikojnë edhe lodhjen për shkak se qëndrimi i Britanisë brenda Unionit është ajo që ka një rëndësi të veçantë për ta.