Matura Shtetërore, MAS shpall lëndët dhe datat e provimeve
Përmes dy udhëzimeve më të fundit, Ministria e Arsimit dhe Sporteve ka përcaktuar lëndët dhe datat e zhvillimit të provimeve të Maturës Shtetërore 2015 dhe për arsimin bazë të detyrueshëm të këtij viti.
Sipas udhëzimeve të veçanta, lëndët e Maturës Shtetërore dhe datat e provimeve do të jenë:
-Gjuha e huaj, më 23 maj;
-Gjuha shqipe dhe Letërsia, më 29 maj;
-Matematika, më 9 qershor;
-Provimet me zgjedhje, më 19 qershor.
Ndërsa datat e zhvillimit të provimeve kombëtare të arsimit bazë do të jenë:
-Gjuha e huaj, më 6 qershor;
-Gjuha shqipe, më 11 qershor;
Matematika, më 16 qershor.
Pikë e veçantë në një prej udhëzimeve është ajo për nxënësit e pakicave kombëtare (greke dhe maqedonase), që zhvillojnë edhe provimin kombëtar të arsimit bazë në lëndën ‘gjuhë amtare’. MAS ka vendosur që ky provim do të zhvillohet më datë 18 qershor.
“Masat për mbarëvajtjen e provimeve përcaktojnë që çdo Drejtori Arsimore Rajonale apo Zyrë Arsimore, brenda datës 25 maj të këtij viti, merr nga shkollat listat e mbetësve të vitit 2014-2015, dhe në datat 25 e 26 maj i pasqyron ato në sistemin elektronik ‘Matura Online’, sipas udhëzimit të dërguar nga Agjencia Kombëtare e Provimeve. Brenda datës 30 maj, DAR/ZA dërgon në AKP, të printuar dhe në kopje elektronike, listat e mbetësve të vitit për çdo shkollë”, thuhet në njoftimin e MAS.
Duke iu referuar udhëzimit, “drejtoritë e shkollave, brenda datës 25 maj 2015, njoftojnë maturantët mbetës që të mos paraqiten në provimet e Maturës Shtetërore 2015, pa likuiduar me parë provimet e klasës”.
