“Mund të ketë viktima në Kuvend”, Hajdari: Më kanë kërcënuar brenda në zyrë

Referuar përplasjeve brenda grupit të saj parlamentar, Rudina Hajdari tha sot se është kërcënuar me jetë.

Ajo u shpreh se ngjarja ka ndodhur brenda zyrës së saj dhe la të nënkuptohet se bëhet fjalë për deputetin Korab Lita. Për ngjarjet, Hajdari ka kërkuar në seancë ndihmën e Gramoz Ruçit.

“Para pak ditësh ju dërgova një shkresë për një kërkesë që të siguronia ambientet e Kuvendit dhe të Kryesisë. Nuk mund të ndodhë sot që deputetët të kërcënohen. E papranueshme që një femër të kërcënohet. Kam pasur raste që në zyrën time më kanë ardhur dhe më kanë kërcënuar. Ka ikur ajo kohë. Ju lutem, merrni masat para se të kemi ndonjë viktimë. Asnjë deputet nuk duhet të hyjë pa u kontrolluar, apo të marrë njerëz të tjerë dhe të shantazhojë. Ju lutem të merren masat” – tha Rudina Hajdari.

Nga ana e tij, Gramoz Ruçi tha se është e drejta e grupeve parlamentare të shkarkojnë apo të zgjedhin anëtarët e tyre. Ai konfirmoi se shqetësimin e Hajdarit ia ka përcjellë ministrit të Punëve të Brendshme dhe punonjësve të Shërbimit.

“Problemet që keni brenda vetes, uluni dhe i zgjidhni sipas principeve demokrate të rregullores së Kuvendit” – tha Ruçi.