Mustafa sot në Bruksel kërkon liberalizmin e vizave për kosovarët
Kryeministri i Kosovës Isa Mustafa, sot udhëton në Bruksel për të prezantuar kërkesën e tij të re në lidhje me liberalizmin e vizave për kosovarët.
Mustafa ka paralajmëruar se do të kërkojë nga Bashkimi Evropian ta shtyjë me kusht për dy vjet ratifikimin e marrëveshjes për shënjimin e vijës kufitare me Malin e Zi dhe fillimisht të liberalizojë vizat për shtetasit e Kosovës.
Ndërsa, në rast se vendi nuk përmbush kërkesën e Komisionit Evropian për ratifikimin e marrëveshjes për demarkacionin me Malin e Zi, atëherë të kthehet sërish regjimi i vizave.
“Në fillim të javës së ardhshme do të shkoj në Bruksel ku edhe do të bisedoj për një zgjidhje që qytetarët të lëvizin sa më shpejt lirshëm”, ka deklaruar kryeministri në vizitën e tij që u bëri bizneseve në Panairin e Përgjithshëm dhe Ndërkombëtar “Prishtina 2017”, në Bërnicë.
