Në Kosovë rreth 200 milionë euro pjesë e ekonomisë së zezë

BE­ja ka mbështetur institucionet e Kosovës në vlerësimin e shtrirjes së ekonomisë joformale në Kosovë. Sot janë publikuar rezultatet e këtij vlerësimi. Këto të dhëna tregojnë se ka një rënie të vogël të nivelit të ekonomisë joformale.

Mirëpo, ende rreth 200 milionë euro janë shënuar si pjesë e ekonomisë së zezë në Kosovë. Buxheti i Kosovës ka humbur rreth 63 milionë euro nga tatimi në të.

Christof Stock, shefi për Bashkëpunim në Zyrën e BE­së në Kosovë, ka theksuar se jeta e qytetarëve të Kosovës nuk mund të përmirësohet nëse nuk e dimë se çfarë po e vështirëson rritjen ekonomike. “Prandaj, nuk mund të flasim në mënyrë reale për luftimin e ekonomisë joformale pa pasur një ide për shtrirjen e saj dhe arsyet”, shtoi Stock.

Që këtej, ishte shumë e rëndësishme që të vlerësohej shtrirja e ekonomisë joformale dhe ky proces i suksesshëm është udhëhequr nga Ministria e Financave dhe institucionet e tjera përkatëse.

Ministri i Financave, Besim Beqaj, ka theksuar rëndësinë e vlerësimit të ekonomisë joformale dhe se si kjo do të ndihmojë institucionet e Kosovës në luftën kundër këtij fenomeni negativ të shoqërisë kosovare. Rezultatet konkrete do të përkthehen në rritje të të hyrave të buxhetit dhe në përmirësimin e cilësisë së jetës së qytetarëve të Kosovës.

Ky vlerësim është bërë i mundur përmes mbështetjes së projektit IPA 2011 “Mbështetje për institucionet e Kosovës në luftimin e krimit financiar dhe ekonomik”, menaxhuar nga Zyra e BE­së në Kosovë.