Ngjela: Nisma për të bllokuar reformën në drejtësi

“Kryeministri duhet të rezistojë për guvernator të huaj”

Tryeza sotme, e thirrur nga kreu i shtetit, Bujar Nishani, për një reformë në drejtësi, shikohet si një tentativë e opozitës për ta bllokuar atë. Ky është konkluzioni i avokat Spartak Ngjelës, kreut të Partisë Ligj dhe Drejtësi, i cili shprehet skeptik për një reformë të paanshme, kërkuar nga kreu i shtetit, duke e konsideruar këtë të fundit një president politik. Sipas Ngjelës, në dy dekada ne nuk kemi arritur të prodhojmë një sistem drejtësie profesional e të paanshëm, dhe një reformë reale ka nevojë për ringritjen e sistemit nga fillimi, duke përfshirë edhe ndërhyrjet në Kushtetutë. Ngjela ka bërë një koment edhe për procesin e zgjedhjes së guvernatorit të ri të Bankës së Shqipërisë, i cili do të propozohet po nga kreu i shtetit. Në lidhje me refuzimin nga Nishani të kërkesës së Kryeministrit Edi Rama për miratimin e një guvernatori të huaj, Ngjela thotë se me këtë veprim, Presidenti kërkon që të fshehë vjedhjen në Bankën e Shqipërisë. Sipas Ngjelës, Rama duhet të rezistojë deri në fund, pasi pa një guvernator profesionist, Shqipëria nuk mund të dalë nga kriza. “Është një zgjedhje shumë e gjetur ish-guvernatori i Bankës Qendrore të Argjentinës, sepse ai është një nga ekonomistët më të mëdhenj të kohës; dhe duhet të kuptohemi: guvernatori duhet të drejtojë politikën monetare, dhe duhet të na përgatisë me kompetencë se çfarë duhet të bëjë Shqipëria në të ardhmen në lidhje me Euro-n”, thotë Ngjela.