Nigeri, sulm me bomba në dy stacione autobusësh, 29 të vdekur

Të paktën 29 persona kanë mbetur të vdekur në veri të Nigerisë, në qytetin Gombe, pas shpërthimeve të bombave në dy stacione autobusësh. Sulmet janë konfirmuar nga një zyrtar i Kryqit të Kuq për “Reuters”.

Militantët e Boko Haram, të cilët kryesisht veprojnë në veri të Nigerisë, i kanë shtuar ndjeshëm sulmet që prej majit kur presidenti Muhammudu Buhari mori detyrën.

Dy ditë më parë, terroristët sulmuan edhe banorët e një fshati në Kamerun, duke ekzekutuar 23 persona, ndërsa javën e kaluar u vranë 49 vetë pas një shpërthimi në një treg në Gombe.

Autoritetet vendase shprehen se ekziston frika se numri i viktimave të dy sulmeve të fundit mund të rritet, pasi shumë prej personave të plagosur janë në gjendje të rëndë.