Nikolla:Modernizimi i sistemit arsimor do të pilotohet në 60 gjimnaze

Modernizimi i sistemit arsimor në Shqipëri do të pilotohet filimisht në 60 shkolla të mesme të përgjithshme, ndërsa krijimi i regjistrave dixhitalë do të jetë një nga arritjet themelore.
Ministrja e Arsimit dhe Sportit, Lindita Nikolla, gjatë fjalës së mbajtur sot në Kuvend, në kuadër të diskutimit të aktit normativ të qeverisë për rishikimin e buxhetit 2014, tha se aktualisht janë 1.2 miliardë lekë që po investohen për dixhitalizimin e sistemit arsimor.

Kjo, sipas ministres, shënon një hop cilësor që na ndan nga e shkuara dhe forcon cilësinë e shkollës në vend.

Projekti i modernizimit të sistemit arsimor në Shqipëri, do të pilotohet fillimisht në 60 gjimnaze, përfshi dhe shkollën Pedagogjike të Elbasanit. “Rishikimi i buxhetit për arsimin mundëson që 60 shkolla të mesme të përgjithshme të përfshihen në projekt, ku ndër të tjera parashikohet ndërtimi i 120 laboratorëve të rinj, shtimi i pajisjeve dixhitale për mësuesit, duke i paraprirë planit trajnues të tyre”, tha Nikolla. Ministrja e Arsimit nënvizoi se finalizimi i këtij projekti do të mundësojë një data bazë të saktë për arsimin parauniversitar në vend.

Në fjalën e saj, ajo u ndal dhe tek pranimet e reja në Universitete për vitin akademik 2014-2015, ku veçoi cilësinë e pranimeve. Për herë të parë në universitetin e Shkencave po vijojnë të regjistrohen maturantë me rezultate të larta, shtoi Nikolla