Një sulm me dron godet objektin mbështetës diplomatik të SHBA-së

Dy dronë goditën një objekt mbështetës diplomatik të SHBA-së në Aeroportin Ndërkombëtar të Bagdadit, duke shënuar sulmin e dytë të tillë brenda dy ditësh.

Duke cituar një burim të paidentifikuar sigurie, Shafaq News raportoi se dy dronët ranë brenda objektit pa u interceptuar.

Për sulmin nuk ka marrë përgjegjësinë asnjë palë.

Autoritetet irakiane dhe ato amerikane nuk kanë reaguar ende lidhur me ngjarjen. I njëjti objekt u sulmua me dron edhe të mërkurën, pa shkaktuar viktima.

Qendra mbështetëse diplomatike e SHBA-së në aeroportin e Bagdadit shërben si një qendër logjistike dhe administrative për diplomatët dhe personelin amerikan në Irak, duke përfshirë zyra administrative, ambiente banimi, zona magazinimi dhe zona të siguruara, si dhe përdoret për lehtësimin e misioneve diplomatike dhe operacioneve mbështetëse për Ambasadën e SHBA-së në Bagdad.

Tensionet rajonale janë përshkallëzuar që nga nisja e ofensivës së përbashkët SHBA-Izrael ndaj Iranit më 28 shkurt, e cila deri tani ka shkaktuar mbi 1.340 viktima, përfshirë edhe liderin suprem të atëhershëm, Ali Khamenei.

Irani është kundërpërgjigjur me sulme me dronë dhe raketa ndaj Izraelit, si dhe ndaj Jordanisë, Irakut dhe vendeve të Gjirit që strehojnë forca ushtarake amerikane.  /os/