‘Non stop’ në punë për ‘FBI-në shqiptare’, mblidhet komisioni i përzgjedhjes, për 60 vende konkurojnë 600 kandidatë
Ka nisur faza e dytë e përzgjedhjes së kandidatëve për hetues në Byron Kombëtare të Hetimit ose të quajtur ndryshe ‘FBI-ja’ shqiptare.
Pas mbylljes së garës për aplikimet, ku shprehën interes gati 600 aplikantë, Komisioni Përzgjedhës i përbërë nga tre prokurorët e SPAK nis fazën e dytë të kontrollit të të dhënave nga ajo çka është dorëzuar online në adresën ‘bkh.al’.
Burime të brendeshme bëjnë me dije se të gjithë aplikantët që do të plotësojnë kriteret në fazën e aplikimit fillestar do të kualifikohen për në fazën e testit të arsyetimit logjik. Procesi i përzgjedhjes po asistohet dhe monitorohet nga Komisioni Ndërkombëtar i Ekspertëve.
Për kandidatët për hetues në BKH ka reaguar disa herë edhe vetë numri 1, i këtij institucioni, Aida Hajnaj duke dhënë mesazhe për ta dhe duke i garantuar për një proces të drejtë dhe transparent nga ku do të përzgjidhen 60 më të mirët.
“Procesi i përzgjedhjes do të asistohet dhe monitorohet nga afër nga Komisioni Ndërkombëtar i Ekspertëve që garanton transparencë dhe objektivitet maksimal në këtë proces.” ka deklaruar Aida Hajnaj.
