Partia Demokratike mbledh Kuvendin Kombëtar

-Partia Demokratike ka mbledhur të shtunën forumin më të lartë të saj, Kuvendin Kombëtar, që synon dhe riorganizimin e kësaj force politike, një vit pas humbjes së thellë në zgjedhjet parlamentare të 23 qershorit.
Janë 7500 delegatë, që përfaqësojnë rreth 101 mijë anëtarë të PD-së, të ftuar për të marrë pjesë në Kuvend, që shënon dhe numrin më të lartë të pjesëmarrësve në një forum të tillë. Përveç fjalës që do të mbahet nga kryetari Lulzim Basha, Kuvendin do ta përshëndesin dhe dy ish-kryetarët e PD-së, Sali Berisha dhe Eduard Selami.
Kuvendi Kombëtar do të zgjedhë anëtarësinë e Këshillit Kombëtar të PD-së, qe do të përbëhet nga 250 anëtarë, ndërsa një moment i rëndësishëm është dhe miratimi i ndryshimeve në statut, që do të prezantohen nga deputeti Eduard Halimi.