Pas autobusit, Berluskoni nxjerr në shitje edhe Milanin

Shitja e autobusit të Milanit për 150 mijë euro, gjest ky që u kthye në objekt humori në rrjetet sociale, tregoi deri ku ka arritur kriza që ka prekur klubin italian.

Kohët e arta ku klubi milanez, shpenzonte shifra të mëdha në merkato kanë marrë fund. Të përditshmet italiane raportojnë se Silvio Berluskoni ka vendosur  të nxjerrë në shitje klubin.

Muajt e fundit, Berluskoni ka pasur tentativa për afrimin pranë klubit të një aksioneri të ri, që do të sillte fonde të nevojshme për levizje në merkato. Por, siç duket ish-Kavaljeri, së fundmi ka vendosur që ta shes të gjithë klubin.

E përditshmja italiane “Corriere della Sera”, raporton se Berluskoni ka deklaruar se pa Champions-in këtë vit  ai do të humbasi edhe 60-70 milion euro të tjera. Këto humbje do ta rëndonin edhe më tej buxhetin klubit, pasi shuma e borxheve të tanishme, shkon në 300 milion euro.

Vlera e klubit milanez ka pësuar zbritje të ndjeshme duke arritur në shumën 500 milion euro. Sezoni i zhgënjyes i ekipit do ta zbriste përsëri këtë vlerë, ndaj Berluskoni nuk do të humbasi me tej. Prandaj, ka vendosur që ta shesi që tani klubin me të cilën ka fituar gjithçka.