Pas Turqisë, Rama shkon në Greqi, sot privatisht Dendias, kryeministri Mistotakis do shtrojë darkë

Pas vizitës në Turqi, kryeministri Rama do të shkojë sot në Greqi, ku do të takohet me homologun grek, Kyriakos Mitsotakis.

Lajmin e kanë bërë me dije media greke, të cilat shkruajnë se kreu i qeverisë shqiptare do të zhvillojë takime me kryeministrin Kyriakos Mitsotakis dhe ministrin e Jashtëm Nikos Dendias.

“Në Athinë për një drekë pune me Kryeministrin Mitzotakis, për të diskutuar mbi koordinimin e mëtejshëm në luftën e përbashkët kundër Covid19; forcimin e mëtejshëm të marrëdhënieve strategjike mes dy vendeve; bashkëpunimin rajonal dhe integrimin europian të rajonit tonë”, shkruan Rama në një postim në Twitter.

Ministri i Jashtëm Nikos Dendias do të ketë një takim privat në Athinë me kryeministrin e Shqipërisë. Më pas, kryeministri Kyriakos Mitsotakis do të shtrojë një darkë me Kryeministrin Rama, ku do të jetë i pranishëm edhe ministri i Jashtëm.

Kjo vizitë vjen në një kohë kur Parlamenti pritet të miratojë dekretin e presidentit për zgjerimin me 12 milje në Jon.

Ndërsa çështja e marrëveshjes për kufirin detar paraprakisht është vendosur që të zgjidhet në Gjykatën e Hagës.