PD, Boçi: Rama shantazhon të rinjtë e ekselencës për anëtarësim në PS

Në një dalje përpara mediave nga selia e PD-së, deputeti demokrat Luçiano Boçi ka akuzuar kryeministrin Rama se i konsideron shkollat publike në vend si organizata të partisë së tij, ndërkohë që të rinjtë e sistemit arsimor parauniversitar si të paditur, duke u kërkuar në mënyrë brutale anëtarësimin në PS përmes letrave shantazhuese dhe të paligjshme.

Letra të tilla, siç i konsideron Boçi, janë publikuar përmes një ekrani në sallën e konferencave për shtyp, duke identifikuar edhe studentët ndaj të cilëve janë dërguar për të marrë prej tyre “Po”-në e shpejtë të anëtarësimit, një delir prej sundimtari të rënduar në kokën e tij, siç shton ai.

Duke mbrojtur të rinjtë gjimnazistë me rezultate të shkëlqyera, për të cilët thotë se kanë arritur deri këtu me mund e me djersë, duke lexuar e studiuar, Boçi akuzon Ramën se u ka dalë para atyre dhe iu ka prerë rrugën, duke u kërkuar me pahir të bëhen pjesë e organizatës së tij të trafikantëve, tutorëve dhe hajdutëve.

“Ne u bëjmë thirrje të rinjve ta hedhin në koshin më të afërt të plehrave këtë  përqeshje dhe shantazh të Edi Ramës. Liria e zgjedhjes në këtë vend është arritur me gjak e sakrifica, dhe nuk mund të preket nga askush. Më të mirët e bijve dhe bijave të Shqipërisë kanë tjetër kurs, atë të vlerave më të mira shqiptare dhe europiane të meritës, konkurrencës së ndershme dhe dinjitetit individual”, ka thënë deputeti Boçi.