Pentagoni shënon 20 vjetorin e fushatës së NATO-s në Kosovë
Gjenerali me katër yje, Dave Goldfein ishte një pilot i thjeshtë që drejtonte një avion F-16, 20 vjet më parë kur forcat e Natos nisën fushatën ajrore kundër Serbisë. Avioni i tij u rrëzua dhe një mision i rrezikshëm bëri të mundur shpëtimin e tij. Goldfein është tani shef i shtabit të forcave ajrore amerikane dhe një nga gjeneralët kryesorë të Pentagonit:
“Ne shkojmë në luftë për të mbrojtur vlerat tona. Ne nuk duam luftë por kur kauza është e drejtë, ne mbrojmë vlerat tona. Kosova është shembulli i fitores të së mirës mbi të keqen. Jam shumë i lumtur që, falë ndërhyrjes së Natos, njerëzit patën një shans për të ardhmen. Jam shumë krenar për atë që arritëm”.
“Ne qëndrojmë me popullin e Kosovës sot, ashtu siç qëndruam 20 vjet më parë,” thotë gjenerali Goldfein.
Muharrem Alijaj, tregoi plot emocione ditën kur humbi motrën e tij kur ishte vetëm 13 vjeç. Ai do të mbahet mend gjithmonë si djali me këmishë të verdhë që u shpëtua nga forcat e Natos.
“Jemi mirënjohës si popull i Kosovës që na ndihmuan dhe që na sollën në liri,” thotë Muharremi, i cili tani ka ndërtuar një jetë të re në Shtetet e Bashkuara.
Ambasadorja e Kosovës në Uashington, Vlora Çitaku, tha se historia e Kosovës dëshmon se sa e lehtë është të dehumanizosh njerëzit e pambrojtur dhe njëkohësisht shembulli më i mirë për atë çfarë mund të arrijë njerëzimi dhe bota e civilizuar kur vendos të mbrojë vlerat e përbashkëta.
“Ishte ndjenjë e veçantë që të jemi sot këtu. Kosova 20 vjet më pas është një vend i lirë, i pavarur, dhe sovran sigurisht me shumë sfida por, është e rëndësishme që ne të vazhdojmë me entuziazëm përpjekjet tona shtet-ndërtuese. Nga dhjetori i vitit të kaluar ne kemi forcat tona ushtarake, mirëpo ne e dimë që ajo çfarë do ta mbajë Kosovën të sigurtë është kualiteti i aleancave tona, kualiteti i aleancave që ndërtojmë. Ne shpresojmë që në një të ardhme të afërt Kosova të jetë anëtare e Natos dhe ushtarët e rinj të FSK-së, jetën e të cilëve e kanë shpëtuar këta gjeneralë që pamë sot, të jenë në gjendje të shërbejnë në ruajtje të paqes në rajon dhe në botë përkrah ushtarëve amerikanë.”
Ceremonia u mbyll me shpalosjen e një pllakate kushtuar 20 vjetorit të fushatës së Natos në Kosovë.
Ylber Bajraktari, tani zyrtar në Pentagon, thotë se është i lumtur që dëgjoi himnet e të dy vendeve, të Shteteve të Bashkuara edhe të Kosovës, dy dekada pas luftës:
“Edhe pse ishte periudhë e vështirë, ato kujtime nuk do të zbehen kurrë. Për mua, një gjë që nuk e harroj është që Amerika vendosi të hyjë në luftë në anën tonë, në anën e viktimës. Nuk është një gjë e lehtë ta bindësh Amerikën të ndërhyjë. Tani që kam fatin të punoj në Pentagon, e di mirë sa e vështirë është që Amerika të futet në luftë, sidomos kur interesat kyçe nuk preken aq shumë.”
Pllakati i vendosur në njërin prej korridoreve të Pentagonit do të qëndrojë aty përgjithmonë, në kujtim të Operacionit Forca Aleate, siç u quajt fushata ajrore e NATO-s e udhëhequr nga SHBA në Ballkan.
