Përfshihet nga flakët trageti me 300 persona i linjës Bari-Durrës

Trageti me pasagjerë, i linjës Bari – Durrës është përfshirë nga flakët gjatë orëve të para të mëngjesit të sotëm. 
Lajmi u konfirmua nga kapitaneria e Portit të Barit, sipas së cilës zjarri kishte rënë në tragetin “Françeska”, i nisur nga Bari rreth orës 23:00 dhe pritej të mbërrinte në Durrës rreth orës 08:00 të mëngjesit të sotëm.Në traget ndodheshin rreth 300 pasagjerë, pjesa më e madhe e të cilëve ishin shqiptarë. Mediat italiane raportojnë se nuk ka pasur persona të lënduar. Ata u transferuan në një tjetër anije që pritet të mbërrijë në portin e Barit rreth orës 10:30 të paradites së sotme dhe më pas do të nisen drejt Durrësit.Trageti u përfshi nga flakë rreth 7 milje larg nga porti i Barit. Mësohet se flakët kanë rënë në një nga motorët e tragetit dhe janë fikur më pas nga sistemi automatik i tragetit.