Policia e Shtetit merr në mbrojtje Tom Doshin

Policia e Shtetit ka marrë në mbrojtje deputetin Tom Doshi, pas akuzave të këtij të fundit ndaj kreut të Kuvendit Ilir Meta se ka paguar për vrasjen e tij dhe të deputetit demokrat Mëhill Fufi.

Lajmin e ka njoftuar vetë Drejtoria e Përgjithshme e Policisë së Shtetit nëpërmjet një prononcimi për “Gazetën Shqiptare”.

Policia nuk ka dhënë shumë detaje se sa është numri i efektivëve që janë vënë në dispozicion të deputetit, por ajo që konfirmohet është vetëm se ndaj Doshit janë shtuar masat e sigurisë, përveç rojeve private që ka punësuar politikani shkodran.

Mbrojtja ndaj tij mësohet se ka nisur që nga dita e premte, ditë kur kryeministri Edi Rama, ministri i Brendshëm Saimir Tahiri dhe deputeti Frroku dhanë dëshmitë e tyre në Prokurorinë e Krimeve të Rënda.

Bëhet me dije se deputeti Doshi nuk ka dorëzuar një kërkesë pran policisë për t’u marrë në mbrojtje, por ka qenë vetë policia ajo që pas deklaratave të tij ka vendosur ta marrë atë në mbrojtje.

Që nga vjeshta e vitit të kaluar, muaji shtator, Tom Doshi kishte punësuar katër truproja dhe kishte blerë një automjet super të blinduar tip “Audi”.