Policia jep detaje mbi arrestimin e Vladimir Gjutës

Policia e Shtetit dha të premten detaje për arrestimin e Vladimir Gjutës një ditë më parë, njeriut që akuzohet për vendosjen e tritolit në farmacinë e të atit të ministrit të Brendshëm, si dhe për kërcënimet me anë të mesazheve telefonike ndaj Saimir Tahirit.

Policia bën me dije se Vladimir Gjuta ndiqej prej 48 orësh dhe gjatë kontrollit në mjetin e tij u gjet një pistoletë me silenciator.

Në momentin e arrestimit, sipas policisë, Gjuta ishte nisur drejt Kukësit për të kërcënuar disa simpatizantë të LSI-së, pasi iu gjet një listë me emrat e simpatizantëve të majtë.

Policia e Shtetit njofton se kanë nisur hetimet për pasuritë e Vladimir Gjutës.