Pranvera e zjarrit/ Chivu kuron Interin nga mendimet e këqija, Thuram është “arma” plus

Gjatë 3 sezoneve të fundit rënia ka qenë gjithmonë në 3 muajt finalë të sezonit. Trajneri rumun kërkon ndryshimin e hapit për të evituar rrezikun.

Cristian Chivu sot do t’i ketë ndoshta të gjithë lojtarët. Disa kthehen zemërthyer, italianët dhe Zielinski, pasi kanë mbetur jashtë Botërorit. Trajneri rumun do të ndjejë edhe entuziazmin e Çalhanoglu. Dikush ka parë një tren të largohet me shpejtësi, ndoshta përfundimisht, dikush ka siguruar fluturimin për herë të parë në karrierë. Kështu është jeta.

Chivu nuk ka luajtur kurrë një Botëror në karrierë, por e di mirë se duhet të marrë masat për fundin e sezonit. Kujdes nga efekti Botëror tek Interi, akoma më shumë në pranverë, kur zikaltrit kanë pasur vështirësi vitet e fundit.

Trajneri duhet të menaxhojë euforinë e atyre që janë kualifikuar për në Botëror dhe mund të shpërqendrohen nga afrimi i udhëtimit për në Amerikë. Mbi të gjitha duhet të mjekojë plagët e atyre që do ta shohin eventin nga shtëpia.

Duke parë fytyrat e atyre që u kthyen nga Bosnja, duket një operacion kompleks psikologjik. Të gjithë vijnë me “kocka të thyera”, Bastoni më shumë se të gjithë. Dhe po të shtosh frenimin zikaltër, që la shenjë në klasifikim, situata bëhet edhe më e vështirë. Para ndërprerjes së kampionatit, Interi mori vetëm 2 pikë në 3 ndeshje.

Rikthimi i Lautaro Martinez është thelbësor për të evituar rishfaqjen e fantazmave. Marcus Thuram është në Pinetina prej së martës, por që para ndërprerjes stafi po shihte te francezi ndryshimin në krahasim me muajt e fundit. Ai mund të konsiderohet “arma” plus.

Në “San Siro” për festa vjen Roma dhe ishte pikërisht kjo ndeshje që sezonin e kaluar filloi rrëshqitjen e Interit. Solli parakalimin e Napolit dhe lamtumirën e titullit. Meqë po flasim për çikatriçe, është kjo periudhë e vitit që e godet Interin. Pranverën 2024-25, në 9 ndeshje pas ndërprerjes, u regjistruan 2 barazime dhe 2 humbje: 10 pikë të djegura dhe lamtumirë ëndërr për lavdi.

The post Pranvera e zjarrit/ Chivu kuron Interin nga mendimet e këqija, Thuram është “arma” plus appeared first on RTSH.