Presidenti Nishani vizitë zyrtare në Bosnjë, i kërkon Sarajevës njohjen e pavarësisë së Kosovës

Presidentit të Republikës iu rezervua një ceremoni zyrtare me të cilën u prit nga homologu i tij i Bosnjes dhe Hercegovinës, Dragan Çoviç, si dhe dy anëtarët e tjerë të Presidencës, Bakir Izetbegoviç dhe Mladen Ivaniç. Pas nderimeve ushtarake të rastit si dhe interpretimet e himneve kombëtar të të dy vendeve, Presidenti Nishani zhvilloi një bisedë konfidenciale me të tre përfaqësuesit e Presidencës së Bosnje dhe Hercegovinës, për të vijuar më pas me takimin mes delegacioneve përkatëse.

Në konferencën për shtyp mes Presidentit Nishani dhe Kryesuesit të Presidencës së Bosnje dhe Hercegovinës, Dragan Çoviç, Kreu i Shtetit shqiptar kërkoi rishikimin e qëndrimit të Sarajevës për njohjen e pavarësisë së Kosovës dhe lehtësimin e qarkullimit të qytetarëve të të dy vendeve përmes njohjes së dokumenteve reciproke, duke i siguruar bashkëbiseduesit se njohja e pavarësisë së Kosovës do të ishte një kontribut shumë i qenësishëm për paqen dhe stabilitetin në rajonin e Evropës Juglindore.

Pala tjetër theksoi se shumë shpejt do të gjendej një zgjidhje për njohjen e dokumenteve të Kosovës, duke premtuar mbajtjen e një takimi me përfaqësuesit e Republikës së Kosovës në Podgoricë të Malit të Zi.

Përsa i përmet marrëdhënieve me Shqipërinë, Nishani evidentoi vullnetin e Tiranës për të nxitur bashkëpunimin dypalësh dhe atë rajonal, veçanërisht në sektorin energjitik dhe të infrastrukturës.