Prishtina e qetë, por pa gjallëri

Pas më shumë se shtatë orë dhunë nga demonstrues e nga policia e Kosovës, në Prishtinë tashmë është çdo gjë e qetë.

Demonstruesit janë larguar nga rrugët e sheshet, ndërsa policë, me numër të zvogëluar, vërehen ende nëpër kënde rrugësh e udhëkryqesh, raporton Koha.net.

Por, kundërmimi dhe gjurmët e një përplasje të madhe që ndodhi pothuaj gjatë gjithë pasdites së sotme ndërmjet protestuesve dhe mbrojtësve të rendit, janë të pranishme nëpër rrugë e sheshe, trotuare e vendkalime:

Gëzhojat e shumta të gazit lotsjellës dhe të plumbave të gomës, gurë, pllaka betoni e shenja komunikacioni të nxjerra shihen kudo nëpër to.

Kompani të ngarkuara për mirëmbajtje të Prishtinës kanë filluar pastrimin e rrugëve, porse pastrimi po bëhet me ngadalësi.

Edhe pse çdo gjë tani është e qetë, vërehet një zbrazëti e madhe nëpër Sheshin kryesor të kryeqytetit. Një heshtje e madhe mbretëron nëpër rrugët e kryeqytetit pasi edhe veturat kanë pakësuar qarkullimin.

Shumë lokale, sidomos në qendër, janë të mbyllura.