Prokuroria e Vlorës i komunikon akuzën Shpëtim Gjikës

Prokuroria e Vlorës i ka komunikuar të premten akuzën kryetarit të bashkisë së Vlorës, Shpëtim Gjika. Ai akuzohet për shpërdorim detyre, falsifikim dokumentesh dhe ndërtim i paligjshëm e kryer në tokë publike ose shtetërore.

Krahas Gjikës, e njëjta akuzë i është komunikuar edhe drejtoreshës së Urbanistikës, Dorjana Sulaj. Ndërkaq, administratorit të një shoqërie ndërtimi në Vlorë, Artur Haxhi akuza do i komunikohet javës tjetër.

Prokuroria bën të ditur se brenda pak ditësh pritet të përfundojnë hetimet dhe në gjykatë do të dërgohet dhe kërkesa për gjykim. Kryetari aktual i bashkisë së Vlorës është përballur edhe më herët me organin e akuzës, në një çështje gjyqësore ku doli i pafajshëm.