Qeveria nxjerr në shitje INSIG
Qeveria ka nisur zyrtarisht procedurat për shitjen e INSIG, kompanisë së vetme publike në tregun e sigurimeve. Ministria e Financave ka publikuar në faqen zyrtare të Agjencisë së Prokurimeve shpalljen për shitjen me tender të aksioneve të INSIG.
Tenderi do të zhvillohet në datës 10 mars të këtij viti, ku shoqëritë e interesuara për blerjen e INSIG duhet të paraqesin ofertën në Ministrinë e Financave. Sipas qeverisë, forma e privatizimit do të jetë shitja 100 për qind e aksioneve të kompanisë së vetme të mbetur publike në tregun financiar.
Më parë qeveria ka përcaktuar edhe edhe kriteret e vlerësimit të ofertave përmes një vendimi të posaçëm. Sipas formulës, peshën më të madhe të pikëve, prej 80 për qind, do ta ketë çmimi i ofruar, ndërsa plani i biznesit dhe cilësia e blerësit do të kenë respektivisht nga 10 pikë. Paralelisht, çdo ofertues duhet të garantojë ofertën e tij me një depozitë fikse prej 30 milionë lekësh. Sipas vendimit, kushtet e kontratës që do të lidhet me shoqërinë fituese duhet të marrin miratimin nga Autoriteti i Mbikëqyrjes Financiare.
Sipas Ministrisë së Financave vlera kontable e shoqërisë INSIG është 15.3 milionë euro. Krahasuar me vitin 2009 kur kompania u nxorr në shitje vlera e saj është ulur me gati 3 herë si pasojë e keqmenaxhimit. Gjatë këtyre viteve kompania ka humbur vazhdimish treg.
Sipas të dhënave zyrtare nga Autoriteti i Mbikqyrjes Financiare për periudhën janar- nëntor të vitit të kaluar kompania arkëtoi 667 milionë lekë nga primet duke zënë kështu 5.7 për qind të tregut të sigurimeve në vend nga 6.3 që zinte një vit më parë.
