Rikthehet alarmi i Fruthit, pas fëmijëve shtohet numri i të rriturve

“Vetëm këto dy javë në mars kemi pasur 50 raste me simptoma të Fruthit”, thotë doktor Arjan Harxhi.

Mjekët thonë se këto janë raste që ose nuk e kanë bërë vaksinën ose nuk kanë kirjuar antitrupa mjaftueshëm, çka bën që kur bie në kontakt me virusin të infektohen. Aktualisht ka vetëm 7 raste të rënda të shtruar në Infektiv.

“Janë me pneumoni, po shyqyr nuk ka pasur raste me encefalit”, thotë dr. Harxhi.

Numri i rasteve të prekur gjithsej ka mbërritur në 271 ku shumicën e përbëjnë fëmijët nën 1 vjeç. Rastet jo të rënda të infektuar me Fruth kthehen në shtëpi duke u këshilluar nga mjekët që të izolohen në mënyrë që të mos infektojnë familjarët e tjerë.

Por a respektohet kjo nga të gjithë, mbetet për tu parë. Ekspertë të Institutit të Shëndetit Publik insistojnë në vaksinimin e të gjithë personave që i përkasin fashës së viteve ‘80-‘90 dhe po ashtu edhe të atyre që dyshojnë se kanë bërë vetëm një dozë të vaksinës.