TURQI – Të paktën tre të vrarë pas sulmit me armë zjarri në një zonë turistike të Stambollit

STAMBOLL, 15 shtator /ATSH-DPA/- Tre persona kanë mbetur të vrarë dhe një tjetër është plagosur në një sulm me armë zjarri në një dyqan në lagjen Fatih të Stambollit, një zonë e frekuentuar nga turistët.

Sipas agjencisë shtetërore turke të lajmeve “Anadolu”, ngjarja ndodhi pas një debati mes pronarit të dyqanit dhe një klienti.

Sipas raportimeve të pakonfirmuara të medieve, debati ka ndodhur në një zyrë këmbimi valutor, ku njerëzit shkojnë për të ndërruar monedhat.

Fillimisht u raportua se dy persona kishin vdekur dhe dy të tjerë ishin plagosur, por pak më vonë autoritetet përditësuan bilancin, duke konfirmuar tre viktima dhe një të plagosur.

Policia ka arrestuar një të dyshuar në vendngjarje, raportoi “Anadolu”.

Të shtënat ndodhën në Sofcu Han, një kompleks dyqanesh pranë Pazarit të Madh, një nga zonat më të njohura tregtare dhe turistike të Stambollit.

Lagjia Fatih, në pjesën evropiane të Stambollit, është një nga qendrat kryesore turistike të qytetit dhe ka shumë dyqane, monumente dhe pika të njohura turistike.

Agjencia private turke e lajmeve DHA, publikoi fotografi ku shihet një person duke u transportuar me barelë drejt një ambulance.

Një video e publikuar në rrjetin social X tregoi gjithashtu pamje nga vendi i ngjarjes. /