“Shqipëria mbështetje të fortë luftës kundër terrorizmit”/ DASH: Reforma të thella në drejtësi, Vetting për 800 gjyqtarë e prokurorë

Departamenti Amerikan i Shtetit (DASH) publikoi sot raportin e përvitshëm për terrorizmin në botë, ku vlerëson se “Shqipëria vazhdoi të mbështesë fort përpjekjet ndërkombëtare të Antiterrorizmit në vitin 2019 dhe kontribuoi në Koalicionin Global për të mposhtur ISIS-in”.

Ndër të tjera, DASH vlerëson se “zbatimi i reformave të thella në sistemin gjyqësor vazhdon, duke filluar me verifikimin e 800 gjyqtarëve dhe prokurorëve të Shqipërisë për korrupsion, paaftësi dhe lidhje me krimin e organizuar”.

“Disa vende europiane ndërmorën hapa konkretë për të luftuar terrorizmin e mbështetur nga regjimi iranian në vitin 2019. Ndër to, Shqipëria, së bashku me Danimarkën dhe Francën reduktuan të gjitha marrëdhëniet diplomatike si kundërpërgjigje ndaj komploteve të mbështetura nga Irani për të kryer atentate ose për të vënë bomba në këto vende”, thuhet në raportin e DASH.

DASH vlerëson se “Shqipëria i dënon penalisht aktet terroriste, financimin e terrorizmit, kryerjen e transaksioneve me persona në listat e sanksioneve të OKB-së, rekrutimin dhe kapacitetin e njerëzve për të kryer akte terroriste, nxitjen e akteve terroriste, udhëheqjen dhe marrjen pjesë në organizata terroriste ose konflikte të armatosura jashtë vendit”.

“Shqipëria ka një sistem mbikëqyrës të sigurisë së porteve në përputhje me kërkesat sipas Kodit Ndërkombëtar të Sigurisë së Objektit Portual të Organizatës Ndërkombëtare Detare. Zbatimi i ligjit në Shqipëri rriti përpjekjet për të luftuar kërcënimet e mundshme terroriste”, thuhet në raport.

DASH çmon po ashtu punën e ngushtë mes Njësisë së Antiterrorizmit të Policisë së Shtetit (CTU) me agjencitë e SHBA-së për të lidhur kërkesat e qeverisë shqiptare me ekspertizën dhe burimet e SHBA-së, duke siguruar që qeveria shqiptare të zhvillojë aftësi të përqendruara të Antiterrorizmit.

“CTU, gjithashtu, mori pjesë në disa ndërhyrje të suksesshme të terroristëve të njohur ose të dyshuar. Në vitin 2019, CTU krijoi një nënnjësi të përqendruar në luftimin e financimit të terrorizmit”, thuhet në raport.

DASH vlerëson se “Qeveria shqiptare ka zhvilluar, në bashkëpunim me partnerët ndërkombëtarë, plane dhe aftësi emergjente për të parandaluar dhe reaguar ndaj sulmeve terroriste kundër shënjestrave të dobëta”.

“Më 23 tetor, Policia e Shtetit Shqiptar njoftoi se kishte prishur sulmet e planifikuara në vitin 2018 nga agjentët iranianë kundër anëtarëve të grupit opozitar iranian, MEK, që jetojnë në Shqipëri”, vlerëson DASH.

Në raport vlerësohet se “Shqipëria vazhdon të ndërmarrë hapa për të përmirësuar sigurinë e saj kufitare, për të zbuluar dhe ndaluar hyrjen e terroristëve dhe në përputhje me standardet e UNSCR 2396, siç është përdorimi i API/ PNR, për të përmirësuar kontrollin e pasagjerëve ajrorë”.

“Shërbimet e zbatimit të ligjit bashkëpunojnë gjerësisht me INTERPOL-in dhe organet e tjera ndërkombëtare të zbatimit të ligjit”, thuhet në raport.