Tahiri në Bruksel për bllokimin e Serbisë në marrjen e kodit telefonik

Ministrja për Dialog e qeverisë së Republikës së Kosovës, Edita Tahiri ka udhëtuar për në Bruksel, ku do takohet me Angelina Eichhorst, drejtore për Evropën Perëndimore, Ballkanin Perëndimor dhe Turqinë, në Shërbimin e Jashtëm të Bashkimit Evropian.

Sipas një njoftimi për shtyp të qeverisë kosovare, në këtë takim do të diskutohet për bllokimin që Serbia po i bën zbatimit të marrëveshjes për Telekomin, përkatësisht kodin shtetëror telefonik për Republikën e Kosovës, pavarësinë e KOSTT-it (Operatori i Sistemit, Transmisionit dhe Tregut të energjisë elektrike të Kosovës) dhe revitalizimin e urës mbi lumin Ibër të Mitrovicës.

“Këto marrëveshje janë arritur në kuadër të pakos së marrëveshjeve të Brukselit të nënshkruara më 25 gusht 2015, por zbatimi i tyre ka qenë shumë i limituar. Serbia përveç se është dashur të mos e pengojë marrjen e kodit shtetëror për Kosovën është dashur që të heq kundërshtimet e saj ndaj vendimit të ENTSO për pranimin e KOSTT-it, si anëtar i barabartë me shtetet e tjera. Po ashtu nga fundi i këtij muaji, sipas marrëveshjes, Bashkimi Evropian duhet të kryejë rikonstruksionin e urës së Mitrovicës dhe ta hapë atë për automjete dhe këmbësorë”, thuhet në njoftim.

Ministrja Edita Tahiri gjithashtu do të takohet edhe me ndërmjetësit e BE-së për marrëveshjet e lartpërmendura si dhe do të udhëheqë delegacionin e Kosovës në kuadër të takimit trilateral për kadastrin, që do të mbahet më 8 qershor 2016.