Tahiri: Zgjedhjet më të mira dhe më të qeta në historinë e Shqipërisë

Ministri i Brendshëm Saimir Tahiri, ka vlerësuar zgjedhjet lokale si një nga proceset zgjedhore më të mira dhe me të qeta të zhvilluara ndonjëherë në Shqipëri.

Ai ka vlerësuar Policinë e Shtetit që ka ruajtur standardet më të larta në shërbim të qytetarëve dhe të procesit zgjedhor.

“Ne dhamë shembull qytetarie për këto zgjedhje, këtë të diel fituan të gjithë me zgjedhje të lira dhe të ndershme. Ky është suksesi më i mirë sot, – tha Tahiri në një deklaratë për shtyp. – Kjo është një rrugë pa kthim, një standard që nuk mund të çbëhet. Falënderoj të gjithë kandiatët, veçanërisht të PD, që kontaktova para dhe gjatë procesit zgjedhor, por edhe drejtuesit e policisë dhe 7 mijë punonjësit e policisë që u shërbyen qytatarëve për të arritur standartet më të larta zgjedhore në këto 25 vitet e fundit”, – u shpreh Tahiri

Tahiri pohoi se këto kanë qenë “zgjedhjet më të mira të organizuara ndonjëherë në Shqipëri. Nuk ka pasur asnjë ankesë të vetme në lidhje me mungesën e të dhënave nga ana e qytetarëve. Numri i dublimeve ka qenë 91% më pak në krahasim me zgjedhjet e kaluara. Jam krenar për punën e palodhur të punonjësve të Policisë së Shtetit. Ky ishte procesi më i qetë që Shqipëria ka njohur ndonjëherë gjatë zgjedhjeve pluraliste”, – përfundoi Tahiri.