Takim ballkanik në Tiranë për reformat rajonale në turizëm

Reformat rajonale në fushën e turizmit, ishte në qëndër të bashkëbisedimit në takimin ballkanik mbi turizmin, organizuar në Tiranë nga Sindikata e Pavarur e Kimisë, Ushqimit, Tregtisë dhe Turizmit mbështetur nga fondacioni gjerman “Friedrich Ebert”.

Në panelin e diskutimit ishin të pranishëm Presidenti i Sindikatës së Turizmit turk, Cemail Bakindi, Presidenti i Sindikatës së Turizmit për Rajonin e Egjeut, Habib Karakus, Ljubomira Lonkar, Presidente e Sindikatës kroate të Turizmit, Radan Milanovic, President i Sindikatës së Serbisë, Cede Milinic, President i Sindikatës së Malit të Zi, homologët e tyre të Maqedonisë, Bosnje – Hercegovinës si dhe Milan Jevtis, Përfaqësues i Federatës Evropiane të Sindikatave.

Ministria e Zhvillimit Urban dhe Turizmit u përfaqësua në këtë takim nga zëvendësministri, Alfred Dalipi. Dalipi foli për gjendjen e zhvillimit të industrisë së turizmit, angazhimet si dhe për vizionin e Qeverisë Shqiptare për këtë sektor strategjik të ekonomisë së vendit.

Zëvendësministri u ndal kryesisht tek panorama e zhvillimit kaotik të dy dekadave të fundit, shoqëruar me informalitet dhe presion të madh ndërtimi, situatë kjo aspak e favorshme për industrinë e turizmit.

Në fjalën e mbajtur në këtë takim, zëvendësministri shpjegoi hapat në reformën thelbësore që ka përfshirë sektorin e turizmit. Ai përmendi Draft-Strategjinë Kombëtare 2014-2020, Ligjin e ri të Turizmit, Planin e Përgjithshëm Kombëtar në planifikimin urban, reformat ligjore që do të krijojnë një bazë për një turizëm të qëndrueshëm, si dhe synimin për krijimin e një modeli të integruar, gjithëvjetor të turizmit, me fokus dimensionin kulturor, natyror dhe bregdetar.