Thesari amerikan, masa kundër shmangies së pagesave tatimore prej koorporatave
Departamenti amerikan i Thesarit njoftoi masa të reja, në përpjekje për të shkurajuar kompanitë amerikane nga përdorimi i të ashtuquajturit riorganizim të koorporatës për të zvogëluar faturat tatimore duke u regjistruar në një vend të huaj, ndërkohë që veprimet e koorporatës i kryejnë brenda vendit.
Procesi, siç sqaron “Zëri i Amerikës”, përfshin një firmë të madhe amerikane, e cila blen një firmë të vogël të huaj, të vendosur në një vend me taksa më të ulëta. Rasti i fundit është ai i dy firmave farmaceutike, “Pfizer” me bazë në SHBA dhe “Allergan” me bazë në Irlandë, një bashkim me vlerë 160 miliardë dollarësh. Shkrirja mund t’iu nënshtrohet tani rregullave të reja.
Rregulloret e reja të Departamentit të Thesarit përfshijnë një kufi mbi huamarrjen e brendshme të koorporatës. Kompanitë e përdorin këtë praktikë për të ulur të ardhurat e një dege të koorporatës, zakonisht të asaj brenda vendit, e cila zhytet në hua dhe fitimet ia kalon në formë pagese interesi kompanisë mëmë jashtë shtetit. Pagesat e interesave zbriten nga të ardhurat e kompanisë, duke ulur kështu detyrimin tatimor.
Sekretari i Thesarit, Jacob Leë tha se, në fund të fundit është në dorë të Kongresit të miratojë legjislacionin e ri për të parandaluar kompanitë të bëjnë ndryshime të tilla. Megjithatë, ai shtoi se deri atëherë, kontabilistët krijues do të gjejnë mënyra të reja për të shmangur pagimin e taksave në Shtetet e Bashkuara.
