Tony Parkes ndërron jetë në moshën 76-vjeçare, ikona e futbollit konsiderohej si “Mr.Blackburn Rovers” në Angli

Legjenda e Blackburn Rovers, Tony Parkes, ka ndërruar jetë paraditen e sotme në moshën 76-vjeçare. Lajmin e trishtë e konfirmoi edhe klubi ku Parkes kontribuoi për plot 34 vite.

Mesfushori i lindur në Sheffield u bashkua me Rovers në vitin 1970 dhe regjistroi më shumë se 400 paraqitje deri në vitin 1982.

Pas daljes në pension, ai punoi si ndihmës-trajner i Kenny Dalglish gjatë sezonit të Premier League 1994-95 ku Blackburn Rovers u shpall kampion.

Ai gjithashtu shërbeu si trajner i përkohshëm i klubit në gjashtë raste midis viteve 1986 dhe 2004, duke marrë drejtimin e 74 ndeshjeve në total.

Në vitin 2020, u diagnostikua me sëmundjen e Alzheimerit dhe vajza e tij, Natalie, nisi një fushatë për mbledhje fondesh dy vite më pas për të përballuar kostot e larta për kujdesin e tij.